عزيز الله ’عزيز‘ بروهي: شاعر، اديب ۽ سماجي ڪارڪن عزيز الله بروهي، پهرين اپريل 1950ع تي ڳوٺ خداآباد (رسول بخش بروهي)، تعلقي ڳڙهي خيري، ضلعي جيڪب آباد ۾ عبدالحڪيم بروهيءَ جي گهر ۾ جنم ورتو. مقامي اسڪولن مان انٽر تائين تعليم حاصل ڪرڻ بعد ايم. ايس. سي ۽ بي. ايڊ سنڌ يونيورسٽي ڄام شوري مان ڪيائين. عملي زندگيءَ جو آغاز تعليم کاتي ۾ استاد جي حيثيت سان ڪيائين. گورنمينٽ محمدپور اوڍو هاءِ اسڪول ۾ سائنس جي سبجيڪٽ ۾ ايڇ. ايس. ٽي مقرر ٿيو. بعد ۾ ساڳئي اسڪول ۾ هيڊماستر رهيو، جتان ارڙهين گريڊ ۾ رٽائر ٿيو. کيس علم ادب سان چاهه شاگرديءَ واري دور کان رهيو آهي. سنڌي، اردو ۽ براهوي ٻولين ۾ شاعري ڪئي اٿس. شاعريءَ ۾ ‘عزيز’ تخلص ڪتب آڻيندو آهي. سائنس جي موضوع تي تمام گهڻو لکيو اٿس. سندس شاعري توڙي سائنسي، تحقيقي ۽ سماجي موضوعن تي مقالا ۽ مضمون سنڌ توڙي بلوچستان جي اخبارن، رسالن ۽ ڪتابن ۾ شايع ٿيندا رهيا آهن. سندس سنڌي ڪلام ڪراچي ٽي. وي ۽ براهوي ڪلام ڪوئيٽا ٽي. وي تان نشر ٿي چڪو آهي. ڪوئيٽا ٽي. وي جي ڪيترن ئي براهوي مشاعرن ۾ شرڪت ڪري چڪو آهي.سندس هڪ ڪتاب ‘قدرت جون سائنسي ڪاريگريون’ شايع ٿيل آهي، جيڪو بعد ۾ سنڌي لئنگئيج اٿارٽي حيدرآباد پاران ‘خالق جون سائنسي ڪاريگريون’ نالي سان 1994ع ۾ ٻيهر شايع ٿي چڪو آهي. هن محمدپور اوڍو ۾ نامور محقق رحيمداد خان مولائي شيدائيءَ جي نالي سان هڪ علمي ۽ ادبي ادارو ڪيو. ان اداري پاران براهوي زبان ۾ ‘ڪپوت’ نالي سان ڪتابي سلسلو جاري ڪيائين، جنهن جي پليٽ فارم تان ڪيترائي ڪتاب شايع ڪرائي چڪو آهي. کيس سنڌ ۽ بلوچستان جي ڪيترن ئي علمي ادبي ادارن ۽ تنظيمن پاران مڃتا اوارڊ پڻ مليا آهن. پاڻ سماجي ڪمن ۾ تمام گهڻو سرگرم رهيو آهي.
1950.04.01 عيسوي
شاعر، اديب ۽ سماجي ڪارڪن عزيز الله بروهي، پهرين اپريل 1950ع تي ڳوٺ خداآباد (رسول بخش بروهي)، تعلقي ڳڙهي خيري، ضلعي جيڪب آباد ۾ عبدالحڪيم بروهيءَ جي گهر ۾ جنم ورتو.